Vorstand.

Social-Media
Es liggt nit wyt, dass dr Sanitärinstallateur am liebschte ufem WC hoggt. Immer, wenn dr Diggi e Sitzig het, durchforschtet er die soziale Plattforme bis in hinterschte Egge. Egal, ob siessi Kätzli uf Instagram, FCB-News uf Facebook oder luschtige Saich uf Youtube, alles isch ihm rächt. Drmit er aber au mol produktiv isch und nit nur Scheiss produziert, wird er künftig unseri Kanäl pflääge.
Wenn dr Diggi nit grad uf dr Schüssle hoggt, paggt er bim FC Münchestei mit aa oder spiilt gärn Fifa uf dr Playstation.
Lieblingsgedrängg: Whisky

Kommunikation
Dr Dare spiilt Unihockey und isch Trainer bim UHC Basel United. Er isch Mitgliid in dr 1884 Fasnachtsgsellschaft und isst kei Kääs. Drmit er sis Studium - Dütschi Philologie und Mediewüsseschafte - immerhin ai Mol aawände kah, hänn mir em Dare s'Amt vom Kommunikationsverantwortliche gschaffe. Datsächligg macht er aber vyyl mee: S'kreative Köpfli hinter em legendärschte Eventverein us dr Region het überall sini Finger dinn, er macht s'Unmögliche möglich und überrascht uns immer wider mit sim Scharfsinn. Dr Dare überzügt aber nit nur mit sim Intelläkt, er gseht au no überdurchschnittlich guet us und verfiegt über e aimolige Sinn für Humor. Sini sagehafti Persönliggkeit wird durch e bispiillosi Beschaidehait abgrundet.
Lieblingsgedrängg: Gin-Tonic

Finanze
Wer e Wirtschaftsstudium absolviert, ghört ind Finanze. Will dr Stücki sich als Schiri gwohnt isch, dr Chef z'markiere, macht er au bi uns dr Finanzchef. Es isch e undanggbari Uffgob, wo mir erscht rächt danggend an ihn delegiere. Dangge könne mir ihm au do drfür, dass er im Coop für volli Regal sorgt.
Nit nur als Schiri isch dr Stücki im Fuessballbusiness tätig, au als Spieler übernimmt er gärn d'Verantwortig ufem Blatz. Überall ihsetzbar, mit filigraner Technik und unüberträffbarer Übersicht fiehrt er sini Mannschaft in dr vierte Regionalliga zum Sieg und zum Bier.
Lieblingsgedrängg: Caipirinha

Erschte Revisor
Unsere zwaite Wirtschaftsstudänt, dr Michel, macht dr erschti Revisor. Bösi Zunge behaupte, dass ers gniesst, nur ai Mol im Joor wirklich für dr Verein z'schaffe - no böseri Zunge behaupte, dass er sich au denne primär ufs Bier an dr Revision freut. Tatsächligg isch dr Michel aber e Routinier - und mir rede nit nur vom Bier dringge. Scho in sinere Gugge, wo'n'er mit Härz und Seel drby isch, macht er nämmligg dr Kassier.
Dr Michel reist sehr gärn mitem Zug durch d'Schwiiz und spaziert drby gmietligg durch verschiideni Städt - sogar durch Züri. Er het au mol Fuessball gspielt, aber will er nit het welle Teil sii vo däm mafiöse Konstruggt, het er sini Karriere no als Junior an Nagel ghängt und em FC Barcelona e Abfuhr erteilt.
Lieblingsgedrängg: Wasser

Zwaite Revisor
E sone uffwändigs Amt wie das vom Revisor muess norüüdligg uf vier Schultere verteilt wärde. Oder mir hänn halt au drey Wirtschaftsstudänte und kei witeri Idee gha, wie mir die alli im Vorstand wänn unterbringe. So oder so: Dr Marc isch dr ainzig vo de Wirtschäftler, wo au tatsächligg in dr Wirtschaft schafft, die andere hänn nämmligg nonig mol s'Studium gschafft. Wenn er denn so gschafft vom Schaffe isch, schuttet dr Marc in dr zwaite Mannschaft vom FC Rynach - wenigstens aine, wo's richtig macht. Wenn dir dr Marc für e Zitli nit in Basel gsehnd, isch das nit alllzu überraschend: Im Summer surft er uf Bali in Sunneuntergang und im Winter düst er mitem Snowboard durch d'Alpe.
Lieblingsgedrängg: Bier

Acts
D'Lara verkörperet all das, wo mir im Verein könne bruuche. Zum aine isch sie unseri Quotefrau, schliessligg simmer zytgrächt unterwäggs, zum andere kennt sie die Lüt, wo's brucht, zum e gmietliggi Fete zur derbschte Abrissparty z'mache. Egal, ob DJ oder Live-Band, d'Lara bringt die beschte Newcommer und die geilschte Künstler uf unseri Bühni.
Schaffe duet d'Lara ebefalls in dr Chemie, aber als KV-Ahgstellti. Usserdäm spielt sie Volleyball bim VBC Münchestei und het dört nodüürligg d'Nummere 69 ufem Trikot.
Lieblingsgedrängg: Nudelsuppe

Sponsoring
Unser seriösischts Mitgliid isch dr Tobi, e etablierte Biolaborant. Er wird wäge däm mit Lüt und Firme in Kontaggt trätte, zum uns Gäld bsorge. Scho syt Monate verhandlet er mit nationale und internationale Grosskonzärn und kunnt vor lutter Aagebot gar nümm noche. Wenn du au Interässe hesch, als Sponsor bi uns yyz'stiige (Mir mache jede Saich für Gäld!), denn mäld di doch am beschte diräggt bim Tobi.
So seriös er am Afang au schyyne mag, dr Tobi het au e dunggli Sitte. Im Boxclub bereitet er sich vor - uf was wüsse mir nonig - und bi sinere Arbet ischs lut insiderinformatione vor allem s Uffschniide vo läbende Tier, wo ihm Spass macht.
Lieblingsgedrängg: Frozen Mango-Margarita